Policia e Korçës godet një grup të trafikut të drogës në operacionin “Shufrat”, dy të arrestuar dhe dy në kërkim
Policia e Korçës ka finalizuar me sukses fazën e dytë të operacionit të koduar “Shufrat”, duke goditur një rrjet kriminal të përfshirë në trafikimin e lëndëve narkotike. Pas një hetimi 6-mujor, të zhvilluar me metoda proaktive nga Seksioni për Hetimin e Narkotikëve në DVP Korçë, nën drejtimin e Prokurorisë së Korçës, janë dokumentuar aktivitetet kriminale të katër shtetasve.
Në kuadër të operacionit janë ekzekutuar masat e sigurisë ndaj dy të dyshuarve: E. M., 38 vjeç, banues në Tiranë, dhe I. O., 62 vjeç, banues në Durrës. Të dy janë arrestuar dhe janë dërguar në burg, me akuzën e “trafikimit të narkotikëve, kryer në bashkëpunim”.
Ndërkohë, janë shpallur në kërkim edhe dy shtetas të tjerë: F. K., 39 vjeç, banues në Tiranë, dhe E. O., 24 vjeç, banues në Durrës, për të cilët Gjykata ka caktuar masën e sigurisë “arrest në burg”.
Sipas hetimeve, këta persona ishin pjesë e një grupi që tentoi të trafikonte 56 kilogramë cannabis sativa, të fshehura në 44 shufra metalike të montuara në tavanin e një kamioni me destinacion Greqinë.
Gjithashtu, në kuadër të këtij operacioni, është marrë masa disiplinore ndaj një punonjësi të DPSHTRR-së, A. H., 63 vjeç, banues në Tiranë, i cili është pezulluar nga detyra. Ai dyshohet se ka shpërdoruar detyrën duke ndryshuar targat dhe pronësinë e automjeteve të përfshira në këtë aktivitet të paligjshëm.
Një automjet i dyshuar si i përdorur për trafikim droge është sekuestruar nga policia.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
